【我想放假啊！】公司聲稱有得放生日假？　上司唔批，你永遠都冇得放

　　而家啲公司請人，愈嚟愈傾向用唔同種類、奇形怪狀嘅福利去豐富佢嘅package，例如強積金公司供款提高、家屬保險、購物優惠、Birthday leave 等等，從而去減低「薪金」呢個錢主導嘅社會。今日，想講吓birthday leave 呢樣野，佢就好似天上嘅星星咁，明明你係entitle左，但你永遠都唔會放到呢個假。

　　公司birthday leave 政策好簡單，只要你係公司做夠一年，第二年嘅工作年度即可得到birthday leave。而birthday leave 呢一日假，你只可以選擇係生日月份請假，假如生日月份內冇放假就視為放棄；同時，事前亦要得到上司批准先可以放假。

　　明眼人睇到呢度，相信已經搵到問題所在！雖然公司唔係賤格到要2月29號生日嘅同事等4年先可以放一次birthday leave，但「要得到上司批准先可以放假」呢個條件實在講哂！「high season好忙啊，全世界唔準攞假」、「low season個個爭住放假，你俾其他人清左假先喇」。最終決定權係上司手上，佢話唔俾放就唔俾放，話之HR俾一星期birthday leave你吖，放唔到假咪又係廢物，最慘就係冇錢補仲要俾人forfeit埋！

　　所以其實而家出去見工，真係要好小心。唔知大家記唔記得每次見工，interviewer或者HR都會問你有冇問題問佢。成日覺得冇問題問人好似唔著緊份工？而家知要問咩啦？問下條Team嘅Team structure、放假程序及年假詳情等等。咁樣做除左俾人覺得你對公司有興趣、想了解公司內部多啲，仲係評價呢份工有冇伏嘅好指標。

　　試諗下，假如成條team得你一個薯仔，唔好講話放birthday leave，放放吓sick leave都急call召喚返公司啦；另外，年假詳情除左你地私下傾有幾多日annual，當然仲要問吓你entitle嘅假，如birthday leave呢啲放唔哂嘅假點處置啦？可唔可以帶去下年？會唔會當日薪出返？如果同我公司一樣要該月份內放假、同時公司放假機會又好罕見，咁你就要好好諗下假如冇左呢啲「非薪金」形式嘅benefit，你個offer仲吸唔吸引。

　　要記住，隨住社會變化，吸血嘅公司同人事制度都識轉變。你為左生存會增值自己，吸血鬼都會為左吸血去整多啲唔同嘅野去呃你。所以，以後每次返新工簽新offer前，都要問清楚所有詳細資料。同埋，小心眼啲咁睇，假如有啲公司人工唔肯俾多，但就不停俾其他benefit你去豐富個package，呢啲offer，你更加要再三諗清楚！